Panggép hen iFarangaw
Ad Farangaw wat am-ammay way fabréy te nampaliwéh ah filig. Ammay ah i-man-inungaran no laychén way manaynan hen fiyag ah syudad. Ahchi wat natarna ya na-ornos ya nacharos hen anginna. Hen Natonin wat cha awagan hen tapen tatagu ah safaliy fabréy way Farangaw ono Balangao. Hen alen hen iFarangaw wat Finarangaw ngém ekat chillu hen kachuaran way Farangaw ono Balangao.
Hen cha marpowan hen cha iyatagun hen kachuaran way iFarangaw wat hen mamayawancha ya hen mangumaancha ya mammur-ancha ah heno way mafalin iyatagu. Pagéy hen kangrunaan way cha iyamman hen iFarangaw. Mamegwacha man-apet ah payaw ya mamenghan agé ah uma hen unig hen ihay tawén. Hen tapen chacha imura wat fa-aw, an cha hamchà, mani, lòto ya anat anchichay prutas. Ammag hen érégna yanggay way iyatagun hen hempamilya hen chacha iyamma te naligat hen korsa wat maid ekamancha way i mangenlao ah luwar no wachay apeténcha.
Hen anchi tawén way 1960, Ummale cha Joanne Shetler an Anne Fetcher ad Balangao way i mangachar hen ugali ya alen hen iFarangaw. Angkay na-ammaan hen orthografin hen Balangao yag inlugicha way mangentranslate hen Alen Apudyus ah alen paat hen iFarangaw. Hen problema te achi ammun hen tatagu way mamasa hen anchi cha mesorat esonga ummale ah Robyn Terrey way narpo ad Australia way i tomorong way manudtuchu hen iFarangaw ta makafasacha. Gapon chan uswil-an anchichay tapena ah literacy wat enacharcha way mamfasa ya mansorat yag mafalin way fasééncha ya ma-awatancha hen Alen Apudyus way nesorat paat ah alecha way Finarangaw.
Hen anchi tawén way 1982 wat yachin nedidikaran hen Balangao New Testament. Hen yachi way tempo wat an yanggay anchi ne-print hen mafalin way mafasaan hen Alen Apudyus ngém ad uwan way wacha hen internet wat mafalin way mafasa hen Balangao New Testament ah Website ya uray agé ah Apps. No panggép agé hen Old Testament, wat madama way cha metranslate yag sapay ta achi mafayag yag kompleto koma hen Balangao Bible para hen amin way iFarangaw ah kalotarota.
